Ég á afmæli í dag:)
Mér finnst afskaplega gaman að eiga afmæli:)

Þakka þér kærlega fyrir afmæliskveðjuna -hvaff, þér er boðið í afmælið mitt þegar það verður þó að þú sért ósammála því að halda uppá annað en tugafmæli - þér er líka boðið Heimir Há:)

Ég var að frétta að þeir ætla að halda aðra sing-along-sýningu á Mamma Mia á fimmtudag/föstudag ... hver er maður? :)

Lifið heil

Oh, ég sá Wall-E í gær .... awwwww :)

Mér fannst hún æðisleg og henni verður bætt við safnið um leið og hún kemur á DVD, ég er ennþá brosandi;)

Ég fór líka og sótti litla bróður minn á flugvöllinn seint, seint í gærkvöldi. Hann var að koma frá Króatíu þar sem hann var búinn að vera í um viku með kærustunni sinni og dóttur. Hann fór til Afganistan í júní en var kallaður fyrr heim en stóð til því núna vilja þeir senda hann til Líberíu. Líbería er í Afríku, vestan við Fílabeinsströndina ef þið eruð ekki viss á því hvar þetta land er ... ég varð að fletta því upp:) sumsé, hann er kominn heim en stoppar stutt því hann fer líklega út aftur á fimmtudagsmorguninn, geðveikt spennandi allt saman:)

Í kvöld er ég að fara í félagi við fullt af skemmtilegum stelpum í innflutningspizzupartý og ég hlakka barasta hellings til! :)

Góðar stundir

Ég var að lesa síðustu færslu og gat rétt stautaði mig frammúr henni ... ég er ekki að segja að ég geti unnið verðlaun fyrir samfelldan texta ef ég einbeiti mér, ég geri mér grein fyrir að ég tala og skrifa frekar lélega íslensku en maður lifandi, ég verð að hætta að blogga í vinnunni!!

Þegar ég er að vinna skrifa ég eina og eina setningu á milli þess sem ég athuga hvort menn andi, á afskaplega misgáfulegar samræður við fólk í alls konar ástandi, annarlegu og öðruvísi, og fylgist með því sem er að gerast allt í kringum mig - það er greinilega of mikið að gerast í hérna á sunnudagsmorgunum til að ég geti komið frá mér vitrænum texta.

Ég þekkti sumsé strákana vel í sundur, það var miklu meiri stærðarmunur á þeim en á hestunum, Grímur er að verða níu ára og Elvar Örn að verða sjö og bræðurnir eru með mismunandi háralit, ekki hestarnir. Svo gleymdi ég að minnast á smurða nestið í ferðinni sem Hrafnhildur kona Einars kom með fyrir okkur og vöfflurnar sem hún var að baka þegar við komum heim:)

Annað hvort verð ég að hætta að skrifa í vinnunni eða skrifa í stuttum setningum. Sem segja frá öllu sem er sagnavert. Njálustíll. Eða bara listar, upptalningar og staðreyndir eins og tímasetningar, dagar, félagar, fjarlægðir eknar og gengnar? En eru þannig blogg ekki skelfilega leiðinleg aflestrar?

Blitzblogg er eflaust málið. Engar málalengingar eða smáatriði, nema auðvitað að blitzbloggið sé um eitthvert smáatriðið, en þau eru yfirleitt svo smávægileg að þau eiga sér engin smáatriði sjálf, nema hjá sumu fólki. Við sjáum lífið ekki öll eins, sem betur fer kannski?

Lifið heil

Vika í Menningarnótt og svo á ég afmæli :) Síðasti frídagur mánaðarins var síðasta þriðjudag (næsti frídagur er líklega ekki fyrr en 8. september) en ég notaði hann ofsalega vel:) ég sló grasið (ég er hætt að tala um gras"flötina" og tala héðan í frá bara um grasið, það er ekki mikið flatt nefnilega, aðallega upp og niður) og svo fór ég á hestbak með Maju uppí Borgarfirði:) við vorum tvo, þrjá tíma á leið úr Norðurárdalnum yfir í Þverársíðuna og við skemmtum okkur konunglega - ferðalagið endaði að vísu ekki sérstaklega vel hjá Maju en við vissum það ekki þarna um kvöldið þannig að þá var þetta alveg afskaplega gaman:)

Ég fékk hest sem heitir Mósi (því hann er mósóttur eða móálóttur) og við vorum mjög ólíkir persónuleikar. Hann vildi alltaf vera fremstur en ekki ég (aðallega því ég vissi ekki hvert ég var að fara) og svo var hann alltaf að prumpa, nema einu sinni þegar það kom með'í beint fyrir framan Maju og Yl ... jamms, við vorum mjög ólík við Mósi en þetta gekk alveg bærilega hjá okkur :) Það voru fimm hestar ferðinni, Mósi, Þytur, Helmingur (heitir Darri en er svo lítill að hann er kallaður Helmingur, ekki sérlega fallegt en fyndið, soldið eins og að hlæja að öryrkjabrandara), Ylur og Flicka og við vorum þrjú fullorðin (Einar bóndinn sem á hestana, Maja og ég sjálf) og tveir litlir strákar (synir Einars) sem skiptust á að vera á Þyt/Helming - þekkti þá tvo ekki í sundur því þeir eru alveg eins á litinn en ég hef ekki hugmynd hvað sá litur heitir því ekki getur verið að þeir séu bara dökkbrúnir?:)

Þegar við vorum hálfnuð tilbaka fékk ég hest til að teyma líka, hún hét Flicka og er rauðblesótt, sokkótt og glófext - minnir mig, dýralitir hafa aldrei verið mín sterkasta hlið ;) ég teymdi hana alveg upp fjall og hálfa leið niður gil hinum megin, alveg þangað til við komum að á, pínkulítil spræna, við vorum margbúin að fara yfir Norðuránna - eða svona "afleggjara" af henni - og þá var ekkert vesen, sýndist mér á Maju sem hélt í hana þá, þannig að ég bjóst ekki við neinu ... Við Mósi fórum yfir ánna en Flicka snarstoppaði á árbakkanum þannig að ég kipptist næstum afturábak af hnakknum og ég missti takið á taumnum. Einar reddaði þessu, hann var á Þyt með Helming í taumi, hann rétti mér tauminn og fór yfir ánna til að ná í Flicku og saman komust þau yfir í svona annarri, þriðju tilraun:)

Eftir ánna fórum við meira niður gilið og á einum stað var svo bratt að ég varð að halla mér aftur, niður brattann, stóð í ístöðunum, með hest í taumi og allt í einu kom svona "vúhúúúú" útum munninn á mér (já, lúði af guðs náð elskurnar mínar) þegar Maja og Einar litu við til að sjá hvort það væri ekki í lagi með mig fann ég mig knúna til að útskýra kallið með því að hrópa, alltof hátt:

Mér líður alveg eins og kúreka!!

Ójá. Sem betur fer var farið að skyggja og það sá mig enginn roðna:)

Og ef einhver er að spá í hvernig minn húmor er þá fór ég að flissa eins og fáviti (og ætlaði ekki að geta hætt, það komu tár) þegar við vorum komin tilbaka því ég fattaði að ég hefði verið með hest, misst hann og fengið Helming tilbaka;)

Góðar stundir

Gjörgæslan drap blómið mitt endanlega ... ég setti það inní eldhús eftir vinnu á mánudagskvöldið en þegar ég kom heim úr vinnunni á þriðjudagskvöldið leit það út eins og blár aukaleikari í The Mummy:/ greinilega of heitt inni fyrir blómið sem gefur til kynna að það sé í raun útiblóm en hafi bara drepist því það var svo heitt úti á svölunum mínum, ótrúlegt en satt:)

ég er samt ekki búin að henda því, ég setti það aftur útá svalir í kuldan og rigninguna og svo kemur í ljós hvort það lifni nú kannski barasta við þar sem veðrið er ekki alveg eins gott og undanfarið;)

Og -hvaff, það kemur ekki til greina að ég hætti að halda uppá afmælið mitt! Ekki séns:) ef fólk vill ekki koma því ég á ekki tugafmæli þá þarf það ekkert að koma, ég mun halda uppá það samt og ég er klár á því að fullt af fólki mætir því ég er svo hrikalega skemmtileg og baka svo fína súkkulaðiköku að um hana ganga sögur til næsta bæjar;) ... svo er ég svo léleg í að gera eitthvað skipulagt og skemmtilegt þannig að afmælið er kjörin afsökun fyrir veislu/partý/skemmtiferð;)

Vantar einhverjum svefnsófa? Hann er soldið kominn til ára sinna en er víst í alveg þolanlegu ásigkomulagi, fæst gefins á gott heimili:)

Góðar stundir

Kom heim frá Húsafelli í gær:) fór þangað á fimmtudaginn síðasta í góðum hóp og hafði það sérlega gott í mikilli sól og blíðu, kannski aðeins of mikilli sól á köflum því á laugardaginn vorum við farin að leita uppi skugga til að kæla okkur í;)

Alltaf gaman að fara í útilegur og ég er ákveðin í að þessi verði ekki sú síðasta þetta sumarið - ef veður leyfir:) annars var ég að spá í það að halda uppá afmælið mitt með því að afþakka alla pakka og safna liði með mér í Adrenalíngarðinn - hvernig líst fólki á það? endilega bjallið ef þið viljið koma með eða kommentið eða sendið póst ... verið í bandi ef ykkur langar með:)

Annars held ég að ég hafi verið plötuð, aftur.

Ég held að útiblómið mitt sé ekkert útiblóm. Ég held að sölukonan hafi verið að ruglast á blómum, ekki séð blómið sem ég var að kaupa og verið að meina blómið við hliðina. Það var líka blátt, held ég.
Ég held að útiblóm geti ekki óskað sér betra útiveðurs en hefur verið undanfarna viku. Sól og hlýtt á daginn og svo rigning líka í hæfilegum skömmtum - blautum já, en hæfilegum held ég, ef þú ert blóm? Inniblóm hefðu meira að segja verið nokkuð sátt og eflaust lifað af að vera úti yfir nótt og vera úti í rigningunni. Veðrið hefur verið milt og blómvænt í Reykjavíkinni. Fídel hefur meira að segja látið það í friði. Kannski hefði ég átt að taka eftir því betur, Fídel hefur kannski verið að forðast nályktina?

Blómið er sumsé ekki neitt að dafna, það er að blómstra en laufblöðin eru öll að krymplast og deyja:( það á ekki að vera svoleiðis þannig að það er komið inn í gjörgæslu - sjáum hvort blessað blómið hafi það ekki af þegar það fær að standa inni í sólinni, læt ykkur vita:)

Lifið heil

Jújú, eðli vinnunar samkvæmt þá er ég ekki sérlega vinsæl meðal kúnnanna. Viðskiptavinirnir telja mig almennt fremur harðbrjósta og kalda þegar ég sé ekki aumur á þeim og leyfi keðjureykingar ... utandyra ... og eftirlitslaust :)

En ég er alls ekki harðbrjósta, bara hreint ekki neitt þó ég segi sjálf frá. Ég er meira að segja allt, allt of lin og það er fáránlega stutt húsmóðurina í Vesturbænum stundum. Sko, fyrstu viðbrögð við fréttum og atburðum eru einum of oft viðbrögð þessarar tegundar húsmóður en þau vara yfirleitt aðeins jafnlengi og kollurinn er að taka við sér og taka stjórnina. Sem betur fer. Þegar ísbjarnynjan (? er þetta orð íslenskugúrúarnir ykkar ?) lagðist á beit í æðarvarpinu fyrr í sumar fékk ég alveg sting í mig þegar ég hugsaði um alla litlu saklausu, loðnu ungana og ósjálfbjarga ungamömmurnar sem ... þið vitið hvað ég er að fara?

Hvert er Syneta eiginlega að fara? Um hvað er hún að tala?

Jú, þannig er nefnilega mál með vexti að ég er búin að vera í hálfgerðu rusli í alla nótt því ég gleymdi nýja blóminu mínu útá svölum í gærkvöldi. Þetta er að vísu útiblóm og það er ekki alveg rétt að hafi "gleymt" því úti, ég tók ákvörðun um að skilja nýja blómið mitt eftir úti þegar ég fór í vinnuna því veðrið var svo gott, spáð þurrki og það verður að leyfa útiblómum að vera úti er það ekki? Það má ekki ræna plöntur eðlinu bara vegna þess að þær geta ekki gert sig skiljanlegar. Það væri rangt og hvað sem kaldlyndinu og miskunnarleysinu kann að líða þá er ég ekki óréttlát ...

Stuttu eftir að ég var mætt í vinnuna byrjaði hins vegar að rigna og svo fór að hellidemba og það hefur ringt nálega í alla nótt. Ég vökvaði blómið í gær þannig að núna er það kannski drukknað? Eða öll bláu blómin rignd í tætlur?

Það kemur í ljós eftir nokkrar mínútur,

lifið heil

Jæja, now that I've got your attention :)

geri ekki ráð fyrir að þetta verði sérlega langt blogg því milli fimm og sjö á morgnanna þjáist ég gjarnan af athyglisbrest og hérna í geymslunni aðfaranótt laugardags er ég ekki ein um að þjást af einhvers konar röskun :)

síðan ég bloggaði síðast hef ég:

farið á mótorhjóli um Vestfirðina
farið á tvær bæjarhátíðir á jafnmörgum dögum
hitt frábært fólk
séð Mamma Mia
séð Batman The Dark Knight
horft á fjölda Golden Girls þátta
lamið hendinni svo fast í girðingu að ég hélt ég væri brotin og fór á slysó - reyndist sem betur fer bara illa marin :)
sótt fjölskylduvin á flugvöllinn
keyrt á Jökulsárlón og tilbaka
skoðað nýju hverina í Hveragerði, borðaði í Rauða húsinu á Eyrabakka og fór á Draugasafnið á Stokkseyri
næstum því farið í daglegar gönguferðir með hundinn - og stundum með börn líka
farið í fjöruferðir og farið í fótabað í sjónum, einu sinni með hundinn með mér - næst ætlum við að synda (ég er ekki búin að segja honum frá því ennþá)
ég fékk gefins útiblóm sem stendur í svalahurðinni minni - fer inn og út eftir veðri, eins og kötturinn, nema ég stjórna blóminu ... man því miður ekki hvaða tegund blessaða plantan er en blómin eru blá :)
farið í ísbíltúr
farið í lautarferð
farið í verslunarferð í Kringluna!
farið í matarboð
farið í afmælisveislur

... hmmm, held þetta sé það sem ég hef haft fyrir stafni undanfarið? og líka auðvitað mætt í vinnuna, ég er þar til dæmis núna og var að fá skammir fyrir að vera "klikkað ópersónuleg" - ég tók það ekki inná mig;)

sko mig, mánuðurinn ekki liðinn en ég búin að blogga - sjáum til hvort mér takist að blogga aftur áður en hann er alveg úti;)

Lifið heil og verið góð við hvert annað

Ég held það sé kókaín í Eðal toppum.

Lifið heil

Það er ekki hægt að saka mig um að hafa verið dugleg að blogga undanfarið en mér til varnar þá er sumarið of stutt til að eyða frítímanum fyrir framan tölvuna ... ekki að ég hafi átt ofgnógt frítíma undanfarið en núna er ég komin í vinnuna aftur og ætti að geta hripað niður eins og svona einu bloggi á 13 tíma vakt:)

... það eru að vísu fimm tímar búnir af vaktinni nú þegar (er ekki örugglega laugardagseftirmiðdagur??) og ég er ekki búin að afkasta sérlega miklu, nema vinnu auðvitað:) ég er farin að hallast að því að eina fólkið eftir í Reykjavík þessa helgi sé annað hvort fólk sem fékk ekki frí og verður að vinna (eins og ég og vinnufélagarnir) eða snarvitlausir rugludallar sem fara allir á stjá í hópum og gera allt vitlaust:)

Þessi hitabylgja sem var spáð núna um helgina er sóllaus en mikið rosalega er heitt? kannski finnst mér bara svona heitt því það er afskaplega erfitt að stilla hitastigið í vinnunni (það var til dæmis skelfilega kalt hérna í allan vetur) og svo þegar ég fer út klæði ég mig upp eins og ég sé á leiðinni á fjöll um vetur - ætli ég myndi sleppa öllum þessum mótorhjólahlífðarbúnaði ef ég byggi í Aþenu? þar var fólk á mótorhjólum í stuttbuxum einum fata ... jú, og með hjálm en sumir létu sér nægja að halda á honum, kannski segja lögin að fólk verði að bera hjálm við akstur en ekki að hafa hann á höfðinu?

... og kannski virkar þessi orðaleikur ekki á grísku? :)

Við fórum í morgunmat niður í bæ í morgun, á Tíu dropa:) ég fer yfirleitt þangað þegar ég fer á kaffihús því það er svo góður staður og hefur ekkert með það að gera að ég þekki eigendurna, nema bara til að byrja með - þá er ég að meina að vinátta og kunnugleiki við eigendur staðarins kom mér á bragðið og nú er ég húkkt:) en Gunni Palli kokkur (sem ég hef ekki hugmynd um hver er) er alveg sammála mér með að Tíu dropar er heimsóknarinnar virði:) Kíkið endilega sjálf - ég mæli með öllu sem ég hef smakkað þar hingað til;)

Annars fer ég ekki nógu oft á kaffihús þessa dagana ... ég held ég hafi farið síðast á kaffihús í apríl, á Tíu dropa einmitt ... kannski ég fari að stunda þau meira þegar líður að hausti og í vetur?:)

Jú, ég held ég geri það barasta - eruði ekki memm?:)

Lifið heil og ekki vera rugludallar

Ég er að horfa á So I Married an Axe Murderer og mér finnst afskaplega erfitt að venjast þeirri tilfinningu að Shrek sé að "tala fyrir" Mike Myers:)

... kannski er það vísbending um að ég hafi horft of oft á Shrek myndirnar?:)

nah, ekki möguleiki að horfa of oft á svona háklassa bíómyndir, er það nokkuð?;)



ég er í vinnunni núna og klukkan er að slefa í fimm, tíminn milli fimm og sjö líður stundum afturábak hérna í geymslunni - þá er ég yfirleitt orðin þreytt, allt dottið í dúnalogn, fólk sofnað og lítið að gerast - síðustu nótt var hins vegar mikið stuð á viðskiptavinunum og allt annað en rólegt nema bara rétt undir klukkan sjö. Það var einn kúnninn sem kunni sérlega illa við innilokunina (það kann að sjálfsögðu enginn vel við hana en fólk bregst afskaplega mismunandi við orðnum hlut, vægast sagt).

Þessi barði hurðina stöðugt og án hlés í nokkra klukkutíma. Hurðin er úr stáli og höggin eiga það til að síast inn í undirmeðvitundina mína og líkamann þannig að ég spennist öll upp án þess að vita almennilega af því. Það er yfirleitt ekki fyrr en ég er komin heim sem ég fatta að ég er öll stíf í öxlunum og þreytt í bakinu eftir hávaðann. Ekkert sem heit sturta fyrir svefinn lagar ekki, en það var ekki svo auðvelt í morgun. Í gærdag voru nefnilega settir upp pallar beggja vegna við húsið við hliðina á mér. Tilgangur pallanna er allsherjar yfirhalning á húsinu, steypuviðgerðir, málun og að mér sýnist glugga- og þakskipting. Þessum framkvæmdum fylgja högg og ég var nýsofnuð þegar mennirnir byrjuðu að vinna og berja húsið að utan ... til að gera langa sögu stutta þá svaf ég afskaplega laust í allan dag því mig dreymdi í sífellu að ég væri í vinnunni (því höggin voru sambærileg við hávaðann sem einkenndi síðustu nótt) og ekki að sinna henni heldur lægi sofandi á vaktinni, hálfgerð martröð í allan dag - ég er greinilega samviskusöm í svefni líka:)

Góðar stundir

Gleðilega þjóðhátíð rúsínurnar mínar!!



Skjaldarmerkið er fengið af síðu forsetans, textinn undir myndinni er merkilega óskiljanlegur, ég varð lesa hann tvisvar (rólega í seinna skiptið) til að skilja hver var hvað, samt vissi ég það - kannski ætti einhver að gera forsetavefinn aðeins skiljanlegri? og þá er ég ekki að tala um að breyta stílnum, þessi stíll er að sjálfsögðu viðeigandi á vef forsetans en myndatextinn er bara rugl;)

og talandi um texta, ætli þessi frétt á mbl.is sé þýdd?:
Manson fékk fjögur úr fjölskyldunni, Atkins, sem var 22 ára, Charles „Tex" Watson, sem var 25 ára, Patriciu Krenwinkel, 22 ára og and Lindu Kasabian, 20 ára, til að myrða Tate og vini hennar.
[feitletrun mín]

Hvað um það:)

Pálína og Hákon eru að fara að gifta sig í dag:)
ég fer í brúðkaupið beint eftir vinnu og það er ekki laust við að ég hlakki til, ef ég er spennt (og stend algerlega utan við þetta allt saman nema sem venjulegur gestur) get ég ekki ímyndað mér hvernig sjálfum brúðhjónunum líður:) og ég held að sé ekki hægt að panta betra brúðkaupsveður;)

Jamms, ég er farin að hallast að því að 17. júní sé bara allt í lagi dagur - þrátt fyrir vangaveltur fyrri ára eru margir góðir 17. júníar þarna í fortíðinni og mér finnst einhvern vegin eins og það hafi alltaf verið sól þennan dag?

... og núna er ég farin út í hana:)

Lifið heil og skemmtið ykkur vel í dag

Jæja, haldiði að ég hafi ekki verið að vinna 1500 króna afslátt af brazilísku vaxi! Gaman að því en held að ég eigi ekki eftir að nota það þannig að ég er að hugsa um að bjóða það í skiptum - ég má sko gefa alla vinningana sem ég fæ á Núinu ef ég held að ég muni ekki nota þá sjálf:)

Nú stendur afsláttur af brazilísku vaxi til boða fyrir hvern þann sem getur hjálpað mér að finna gott "öryggisafrit" af heimildarþáttaseríunum The Long Way Down og The Long Way Round!!? Ég á líka 2 fyrir 1 bæði á James bönd og Grensásvídeói ef viðkomandi vill það heldur? Fyrir utan vaxið og vídeóspólurnar mun ég vera mjög þakklát og hver vill ekki að ég skuldi þeim greiða?

Önnur öryggiseintök væru einnig vel þegin, bíómyndir/þættir sem þið hafið gaman af og haldið að ég myndi fíla ... og allt matsjó auðvitað, bróðir minn er nefnilega að fara til Afganistans eftir nokkra daga og ég á bara ekki neitt (aldrei þessu vant) til að senda með honum:/

Hugsið málið og skoðið hörðu diskana ykkar, eigiði eitthvað handa mér rúsínurnar mínar?

Lifið heil, góðar stundir og verið í bandi!

Ég man ekki hvenær ég skipti síðast um ljósaperu, ég hef óljósar minningar um að standa á stiga inná baði og skrúfa krónuna úr til að skipta um peru en ég man ekki fyrir mitt litla hvenær það var ... og það er svo langt síðan að ég keypti ljósaperu að ég veit ekki einu sinni hvar þær fást? er hægt að kaupa venjulegar perur í stórmörkuðum?

ég var einmitt í stórmarkaði áðan, þar hitti ég Deezu og hjásvæfuna, gaman að hitta þau, aldrei hitt hann og hef ekki hitt hana lengi, lengi ... samt er styttra síðan ég hitti hana en síðan ég skipti um peru ... eða finnst mér það kannski bara vegna þess að ég les blogg og er meðlimur á Facebook?

skapa blogg og Facebook gervinánd? kannski finnst mér ég bara lifa fínu félagslífi vegna þess að ég á svo marga vini á Facebook og fylgist með svo mörgum bloggum? kannski? nei, varla, það að ég man ekki hvenær ég skipti síðast um peru hlýtur að sýna hvað ég er lítið heima er það ekki? alltaf útá lífinu krakkar, endalaust;)

jamms, eða heima í myrkri? ;)

Lifið heil



ofnhanski

Hurðu, svo bara komst ég ekkert í að blogga:)

Ég var að vinna sko, mjög skiljanlegt að ég skuli ekki hafa haft tíma til að sitja og sinna einkaerindum í tölvunni og allt það:) en svolítið skeflilegt kom fyrir á leiðinni heim!

Ég var að keyra í mesta sakleysi - ég var á bílnum, ekki hjólinu því allt draslið sem fylgir hjólinu var í þurrki eftir svaðilfarir fimmtudagskvöldsins ... sem ég mun segja frá við betra tækifæri - þegar ég á ekki að vera að fara að sofa til dæmis:)

Hvað um það, er að keyra heim og vitiði hvaða lag kom í útvarpinu???!!

Dansi, dansi dúkkan mín!!

Reynið að sofna við það á rípít í höfðinu:D

Góðar stundir

Ég ætla að blogga á eftir en ekki fyrr en á eftir, núna ætla ég að herma eftir Frekjunni, hún er alltaf með afskaplega skemmtileg föstudagsmyndbönd, hérna er mitt:



Góðar stundir

Hurðu, ég fór ekki í leikhús á laugardaginn - kvöldið endaði á pizzu, poppi, kúr og Karate Kid:) afskaplega ljúft og Karate Kid svíkur aldrei, ég keypti allar fjórar myndirnar úti og ég er afskaplega ánægð með þau kaup:)... ég veit, ég á að vera vaxin uppúr svona en, en ... þetta er svona box-sett, allar fjórar (I, II, II og Next Karated Kid með Hillary Swank) og var á tilboði ... Die Hard I-IV voru líka á tilboði;)

ég keypti nokkrar DVD úti;)

vissuð þið að það er fyrirtæki í Reykjavík sem er með afskaplega líkt lógó og það sem frú Miyagi saumaði út og var lógóið hans Daniel LaRusso á mótinu fræga?
Fyrirtækið heitir Sólgarðar og lógóið þeirra er tré fyrir framan gula sól:


Karate Kid merkið er merkilega svipað, bara ekki alveg eins, tréið er minna en sólin og bonsailegra ... ég fann ekki mynd á netinu þannig að ykkur verður að nægja þessi paint mynd sem ég gerð sjálf (enda mikill listamaður) þangað til þið horfið sjálf á myndina aftur;)


þið getið jafnvel haft samband og beðið afskaplega fallega og það er aldrei að vita;)

fríið er annars ekki alveg eins og ég ætlaði mér en samt afskaplega ljúft, ég keypti dekk undir hjólið í dag, T63 dekk frá Michellin þannig að núna eru mér bókstaflega allir vegir færir;)

út að borða og svo fundur í Grindavík annað kvöld, never a dull moment;)

Lifið heil

Þá er síðasta vaktin í törninni langt komin - og ég er að hugsa um að fara í leikhús í kvöld, laugardagskvöld ... mig langar til að sjá Dauðasyndirnar því ég þekki aðstoðarleikstjórann, mig langar líka til að sjá Mr Skallagrímsson og Brák og þessi sagnakeppni þeirra er rosalega spennandi:) ætla að sjá til hvernig ég vakna hvað ég geri, er einhver maður í leikhús?

ég þarf líka að taka til heima ... hef eiginlega ekkert verið heima síðan ég kom til landsins og er ekki einu sinni búin að ganga frá ferðatöskunni ennþá:) en Fídeli er sama eins lengi og ég eyði þeim litla tíma sem ég er heima með honum;)

gallinn við næturvaktir er að vaktafríið er svo stutt (samt lengra en helgarfrí þannig að ég er alls ekki neitt að kvarta, alls ekki neitt) en á milli dagvakta og næturvakta eru næstum því alveg fimm dagar:) ég hef verið að hugsa um það undanfarið hvort ég hafi gert vitleysu með að hafna klikkháum launum fyrir að vera á ekki-svo-háum launum og meira í fríi - ég er nokkuð viss um að ég hafi valið rétt en ég verð sannfærð um það ef mér tekst að nota þessi vaktafríi í sumar:) ef ég geri það ekki vel ég launin næst þegar ég spái í vinnu;)

Lifið heil

Jarðskjálftinn maður!

Ég vaknaði við hann og vissi ekki alveg hvað gekk á, nógu ringluð er ég yfirleitt þegar ég vakna svona um miðjan dag eftir næturvaktir til að ekki bætist við að vera vakin við jarðskjálfta. Rúmið lék á reiðiskjálfi, ég lyfti höfðinu frá koddanum og horfði beint í augun á Fídel sem virtist vera alveg jafnruglaður á þessari truflun og ég. Eiga dýr ekki að vera hrædd við jarðskjálfta? Hann geispaði og teygði úr sér þannig að ég lagðist bara aftur á koddann og ætlaði að sofa aðeins lengur þegar meðvitundin fattaði að þetta hlyti að hafa verið jarðskjálfti ... þannig að ég gerði það eina í stöðunni, stóð upp og kíkti útum gluggan, jú, hjólið stóð ennþá þannig að ég fór bara aftur uppí rúm:) gat að vísu ekki sofnað aftur því ég var víst alveg búin að sofa í að verða átta tíma þannig að ég fór á fætur og maður lifandi hvað ég var með miklar harðsperrur!

ég fór nefnilega á hestbak með Frekjunni á miðvikudagskvöldið og skemmti mér konunglega:) það eru komin nokkur ár síðan ég fór á bak síðast en ég er að hugsa um að láta ekki eins langan tíma líða áður en ég fer næst ... og ekki bara útaf harðsperrunum;) en mér skilst að "seasonið" sé að verða búið sem er synd því ég hefði haldið að það væri skemmtilegast að stunda hestasportið á sumrin? vera að moka skít og frjósa í hel allan veturinn og senda svo alla hestana í sveit um leið og veðrið fer að vera gott:) skringilegt sport, en ábyggilega rosalega gefandi;)

en eitt sem böggar mig alltaf reglulega, rakvélar! Hvað er málið með að vera alltaf að breyta rakvélum sem virka bara fínt, takk fyrir, og setja nýjar og nýjar rakvélar á markaðinn og hætta að selja rakblöðin í þessar gömlu?? Ég var mjög sátt við mína rakvél en svo hættu þeir að selja þær og loks var ekki hægt að fá blöð í hana lengur - ég komst þó upp með að nota hana lengur en flestar býst ég við því það var enn verið að selja blöðin í hana í Ungverjalandi þannig að ég keypti tvo pakka:)
þó kom að því að ég kláraði blöðin og varð að kaupa mér nýja vél um daginn og ég er ekki sátt! Þetta er glæný vél en rakvélablöðin eru handónýt (jafnvel þegar þau eru splunkunýkomin úr umbúðunum) þannig að ég geri ekki ráð fyrir að þessi vél verði lengi á markaðinum - hún virkar bara alls ekki - sem þýðir að ég verð að kaupa mér nýja vél aftur ... kannski er ódýrara að kaupa bara einnota? hvað gerið þið?

Lifið heil

Afskaplega er Facebook skemmtilegt:) ef ekki væri vegna þess myndi ég eflaust ekki vita af því að vinir mínir hafa ... voted on your strengths and weaknesses:

STRENGTHS:
best companion on a desert island
most artistic
merriest

WEAKNESSES:
best dancer
most organized

ekki slæmt að fólk vilji fara með mér á eyðieyju, ég er meira að segja fremur upp með mér en kommon!! þið getið ekki sagt að ég sé slæmur dansari, óskipulögð já, kannski er það rétt, en þið sem eruð að kjósa um danshæfileika mína getið ekki hafa séð mig dansa! ég er "on fire" þegar ég kemst í návígi við dansgólf! ég er að segja ykkur það:)

jamms, klukkan er að verða þrjú um nótt og ég er að skipuleggja sumarið - er á leiðinni í Húsafell eftir nokkra daga, stefni á að kíkja á Akureyri seinna í sumar til að hitta nokkrar stelpur og hvolp, fer væntanlega hringinn með tveim heiðurskonum og ... :)

sem minnir mig á það, hefur þig alltaf langað til að læra á línuskauta? ert þú línuskautari "inní" þér en vantar að læra að tjá það? keyptirðu línuskauta fyrir löngu en notarðu þá aldrei? ertu laus 5. júní klukkan 18:00? vertu í bandi, það er verið að safna liði til að fá námskeiðið ódýrar og auðvitað, the more the merrier:)

Góðar stundir